Eduard Frrokaj
Të shkosh në Meje aty ku ma vranë atdheun …
Sagë për shtëpinë
Nuk është vetëm druri me aromën e tij
as rrudhat në ballin e gjyshes
as kujtimet
në një emër ,në një libër të harruar
është një mister në zemër
një aromë e çuditshme
pothuajse si e lotit,
është mbase ai moment magjik
me atë pamje në Kishën e fshatit
thua ti kronikë e harruar nga Arbëreshët ,
stinët të kalojnë një nga një ,
është dikund një emër
në një urë të vjetër,
në mbrëmje të ngjallet loja dhe kujtimet,
dikund shkruan poezi
dikund sheh ëndrra
gjithmonë mbetesh fëmijë në rrugët e botës
me një sagë për shtëpinë
Shtëpia në vendlindje
Kur të kthehem në shtëpi
te guri im
te kryqi im i padukshëm
do ti numëroj tullat e moteve
do të marrë një gotë verë
nga vreshti historik i gjyshit tim ,
do ta pi deri në fund
do ti lutem Zotit me të harru ty
pikëllimi im …
Kur të kthehem do ti kujtoj gjurmët e mia
ku i kam lënë gishtërinjët
dhe përrallat e fëmijërisë
do ta qajë me lotë lahutën e gjyshit
gotën e verës do ta pi deri në fund
pranë lotit tim shtëpia ime
guri i kryqit tim të padukshëm
Të shkosh në Meje
(Një ditë para ditës së të vdekurve )
Të shkosh në Meje ke me pa bjeshkë e varre
Hasmin ke me e pështy
Trishtimit e lotit ke me ja ba me sy ,
Të shkosh në Meje ke me i mbledh
uratat një nga një
Lak në fyt ke me ja varë kombit
Numrin e jetimëve ke me e pjesëtuar për pesëqind
Kullave ke me ua lanë varur fotot dhe kujtimet
Por ske me ua zbehë krenarinë
Të shkosh në Meje
Ka me të ndjekë një lotë
Me të vrarë në ëndërr
Ke me u dorëzuar para varreve
Por një za ka me thanë pa këta Kosova nuk bahet ,
Pesëmbëdhjetë katunde ke me i kujtuar në vetmi
Edhepse e di se lahutarin e kanë vra
Ti za prapë në Kullë ke me ba
Antoni dhe Xhevdeti kanë me ta
kërkuar kronikën e kohës
Memec ke me u ba
Kodet e Batajnicës kanë me të fol
Për kthimin e djalit dhe pritjen e nuses
Të shkosh në Meje më mirë me fol me pëllumbat në fluturim ,
Lutu për atdhe ,shko dhe bëhu memec
Përballë gjakut
Përballë lutjes …
(Në Meje të Gjakovës forcat serbe grumbulluan me 27 prill 1999 meshkujt e 15 fshatrave duke i ekzekutuar 376 në mesin e tyre 38 fëmijë )
Rrëfimi për një Nanë
(Baladë për nënën Pashke Marku e cila tri ditë pasi ja sollën djemtë nga Batajnica në Meje ,u dogj me benzinë në kujtim të tyre )
Kur u ndaluan Gjevalin dhe Milan Marku në fushë të Mejes ,
Nana u lutë dy herë zotit dhe kombit
Çka i kanë ba kujt në këtë natë barbare
djemtë e mi ,tha
Nanës së Anton Lleshit vrasësit i thanë se po nuk lëvizën ,
Do ti vrasin djemtë para syve të tyre ,
Nanës Zoje Prendi ja vranë pesë djemtë
E ia lanë vetëm një kujtim
Ai momenti i të vetmes shenjë ,
Nanat i panë djemtë të shtrirë në fushë
Me bajoneta barbarësh mbi krye për herë të fundit
Ai momenti për të fundit herë
Më pas ra heshtja dhe u dëgjuan batare të gjata
Djemtë i vranë me plumba në krye
Nanat e dëgjuan kujen larg
Vonë nëpër natë mbërrinë
Atje në Zadrimë ku ka kënduar Fishta
Djemtë e Malësisë vra e coptue
Të nesërmen i nisën për në Batajnicë
Vrasësit nuk kishin lexuar libra
Por kështu e kishin parashikuar tragjeditë e vjetra në varre të katundit qyqja këndonte për fatin e nuseve dhe kthimin e djemëve të Malësisë,
Një ditë të bukur Maji u kthyen ata
Me eshtra të bëra copë e grimë
Me e ruajt kufirin në Dukagjin ,
Mbase një zanë ka thanë atë ditë
A e dini o Gjevalin e Milan Marku
Sa herë është lutë Nana për me u kthye
Nana tri ditë pas si në kryqëzim prej Krishti
Iku e u bë Rozafë me i muros kujtimet e atdheut ,
Lahutën e Malësisë e dinte përmendësh,
I mësoj edhe shenjat e barbarisë,
Të tretën ditë në trupin e saj u vetëflijua profecia
Se nuk mundi të jetoj vetëm me kujtime
Sot i bënë roje djemëve
I bënë roje atdheut
Rrëfimi për një nanë
dheut e atdheut nuk i mbaron kurrë…
Rrëfim
Të shkosh në Guskë
Ti kurrë nuk ke shkuar në fshat
Ke shkuar në legjendë
Ereniku ta fsheh gjakun
Malet ta tregojnë tragjiken
Cigaret mund ti ndezësh në zjarr pakthim
Ti flasësh Zotit deri në harrim
Ata që i preu hasmi të gjithë i ke njohur
Foton e djalit 15 vjeçar nuk e harron
Edhe kjo ditë fshehet prej teje
Të shkosh në Guskë
Ti kurrë nuk ke shkuar në fshat
Ke shkuar në legjendë …
___________________
Forcat serbe me 27 prill 1999 ekzekutuan në masakren e Mejes të gjithë meshkujt e fshatit Guskë nga mosha 15 vjeçare .Nga ky fshat askush nuk mbijetoj )
